Qué ye a Marea Granate?

Marea Granate (Marea Granat) ye un movimiento transnacional y apartidista, formau por emigrants d’o Estau espanyol y simpatizants, que tienen como obchectivo luitar contra as causas que han prevocau a crisi economica y social que nos fa emigrar. A nuestra colla naixe con a calor d’atros movimientos socials apareixius en Espanya en os zaguers anyos. Somos a extensión d’istos difuera d’o país. A nuestra marea ye granat, como a color d’os nuestros pasaportes, simbolo d’a nuestra emigración forzada.

Por qué luitamos?

A nuestra situación actual como emigrants ye o resultau dreito d’as politicas economicas y de l’aumento d’a inchusticia social que bi ha en Espanya. A corrupción, fomentada por un sistema sin d’escruplos, tanto a libel nacional como a libel global, nos ha furtau o nuestro espacio y a inexistent democracia a nuestra voz. Una minoria angluciosa prene as decisions que nos perteneixen pensando nomás en o suyo propio beneficio. Denunciamos o papel actual d’a Troika (UE, BCE y FMI) y o voto rogau.

Animamos a analizar y denunciar as conseqüencias destructivas de l’actual sistema economico: d’una man, identificando as causas que nos han levau a albandonar os nuestros puestos d’orichen, as nuestras familias y as nuestras amistanzas; d’un atra, metendo en releu as dificils condicions de vida d’as personas emigrants.

Somos conscients de que a nuestra no ye una luita isolada, soque as causas que nos han feito marchar d’Espanya tamién se troban en atros países, alavez buscamos establir puents con as collas locals que nos rodian. Antiparti, existen atros colectivos d’emigrants en os nuestros países d’acullida con os que colaboramos creyando un rete de refirme mutuo ta as personas que plegan d’arribar. Marea Granate cristaliza un sentimiento compartiu de cambear as cosas.

Cómo nos organizamos?

Somos un movimiento horizontal que s’achunta regularment en asambleyas tanto presencials como virtuals, a libel local y global. Empentamos nuevas formas de participación, autoorganización y esfensa d’os dreitos que van dillá d’as mugas. Por ixo, somos teixendo un rete de cooperación internacional, unindo-nos a atras iniciativas con a finalidat de construyir un esdevenidero chusto y sin de precariedat.

As nuestras accions tienen como elementos caracteristicos a no-violencia, o respecto mutuo, l’autoorganización, a solidaridat y a busqueda d’o bien común.

Cómo puedo fer parti de Marea Granate?

Partimos d’o prencipio de que totz tenemos muito que aportar. Si has habiu d’emigrar, une-te a la colla local de Marea Granate. Si no existe, t’animamos a creyar-ne una.

Mete-te en contacto con Coordinación y t’explicaremos como funcionamos.

Email: coordinacion (a) mareagranate.org